اعتقال 48 مشجعا زملكاويا

اكدت رابطة وايت نايتس في بيان رسمي لها على صفحتها انه تم اعتقال 48 مشجعا زمللكاويا اليوم الخميس .

وقالت الرابطة فى بيانها على فيسبوك :"النهاردة تم إعتقال حوالي 48 مشجع زملكاوي في محطة القطر في اسكندرية وهم رايحين يحضروا ماتش كرة يد في صالة الأوليمبي.

خلاص بقى العادي ان اي مشجع لأي رياضة وهو رايح يتفرج على فريقه يتحبس ويتجرد من حريته بدون أي وجه حق

في شرع مين بقى الطريق للاستاد أو الصالة آخره زنزانة في سجن مش كرسي في مدرج؟ ومشجعين يقعدوا بالسنتين والتلاتة ورا القضبان في حبس إحتياطي وعلى ذمة قضايا فشنك مفيهاش دليل إدانة واحد؛ والتهمة مشجع!"

وتابع البيان :"جماهير الرياضة مكانهم الطبيعي الاستاد .. ما ينفعش يكونوا نزلاء في السجون ظلمًا وعدوانًا لمجرد إنهم بيحاولوا يشجعوا فرقتهم، وإذا كان ده تعامل الأمن مع جماهير رايحة تحضر ماتش يد في صالة صغيرة.. الوضع هيكون شكله عامل إزاي في نهائي أفريقيا؟".

واضاف البيان :"ومش منطقي ولا طبيعي ولا هنسمح بتكرار مأساة ماتش الوداد في نصف النهائي اللي إتحبس فيها أكتر من 1200 مشجع؛ مايعرفوش هما اتحبسوا ليه ولا تهمتهم إيه، جماهير الرياضة تستحق تعامل آدمي أكتر من كده شوية .. ومش هنسمح إن المشجعين يستمر التعامل المهين معاهم بالشكل ده تاني، الحرية للمدرج .. الحرية للجماهير".