قال الدكتور طارق شوقي وزير التربية والتعليم إنه لن يصرف مليار ونصف المليار جنيه من خزينة الوزارة على تأمين الامتحانات التدريبية، مشددًا أن الطلاب الذين سربوا الامتحان أو بحثوا عن تلك التسريبات هم الخاسرين في تلك الامتحانات.
وقال وزير التربية والتعليم في فيديو نشره عبر حسابه الرسمي على موقع التواصل الاجتماعي "فيسبوك": "احنا نقدر نوقف التسريب، ووقفناه قبل كده في امتحانات الثانوية العامة لسنتين على التوالي، بس ده كان بيحصل باستحكمات أقرب لأن تكون عسكرية، يعني بتتدخل فيها القوات المسلحة والداخلية وشركات تأمين".
واستطرد "شوقي": "كنا بنصرف على عمليات التأمين أكتر من مليار ونص جنيه مصري بدل ما نعالج المرض اللي بنتكلم ليه دلوقتي، احنا النهاردة أتأكدنا من المرض اللي أصاب مجتمعنا من أول اللي سرب الامتحان الغير محسوب قي المجموع بغرض نشر البلبلة مفيش غرض تاني، واكتساب بنط عند الطلاب عشان ياخدوا عنده درس خصوصي، ويدافع عن اللي كان بيعمله زمان، والطلاب كمان اللي بيشيرو الامتحان اللي مش عاوزين يتعلمو".
وأضاف: "احنا قلنا قبل كده أن الامتحانات دي تدريبية عشان امتحانات تانية وتالتة ثانوي، لو الطالب دور على الغش أو تسريب الامتحان في اليوم ده، ده معناه إن ده قراره وهو الخسران وما استفدش من التدريب ولم يعد تفسه جيدًا للامتحانات".
وتابع: "امتحان نهاية العام هيكون على جهاز التابلت، وده هيشرح لكم احنا ليه جبنا التابلت وليه بنعمل تصحيح إلكتروني، الأسئلة هيتم وضعها دون تدخل عنصر بشري، يعني مش هيكون في أي تسريب في الامتحان، فاللي اعتمد على التسريب، التسريب مش هيكون في امتحان نهاية العام، لأن العبرة هتكون امتحانات نهاية السنة".
واستطرد وزير التربية والتعليم: "الوزارة هتعمل تحقيق داخلي عشان نحاسب الناس اللي خالفت ضميرها وسربت الامتحان، ولو إن التسريب ده لم يؤثر على الوزارة".
وتجدر الإشارة إلى أن أسئلة الامتحانات بالنظام الجديد المعروفة بـ "الكتاب المفتوح" غير تقليدية ولا تتبع الأسلوب المباشر القديم، وهو ما يعني أن إجاباتها ليست موجودة نصًا في الكتاب، بل تعتمد على فهم الطالب والطالبة للمعلومة وقدرته على التعامل معها بطرق مختلفة.
كما أنه لا توجد إجابات نموذجية كتلك الموجودة في النظام القديم التقليدي القائم على الحفظ والتلقين.
تابعوا آخر أهل مصر على Google News
