علق رضا عبد العال المدير الفنى لبلدية المحلة، على مباراة نادي الأهلي والمقاصة، والتي انتهت بفوز الأحمر بهدفين دون رد، قائلا: "فايلر انطلق بالنادي الأهلي إلى القمر الصناعي وبيغرد لوحده فوق في الجو والنادي الأهلي مفيش فريق هيوقفه ولكنه بيلعب بأي حد والشكل حاجة تفرح".
وتابع رضا عبد العال عبر بثه مقطع فيديو على صفحته على يوتيوب: "الشوط الأول بين الأهلي والمقاصة كان من أحسن الأشواط اللي عملتها المقاصة السنة دي فريق متزن وعنده سرعة في الأداء والأهلي معملش إلا هجمة واحدة".
وأضاف: "بقول لفايلر لازم يكون فيه رأس حربة علشان يترجم لك الحاجات اللي بتحصل من قفشة والسولية ووليد سليمان ومحمد هاني وأي حد يلعب في الحتة دي هيبقى كويس ويجيب أجوان إلا مروان محسن وأزارو وبقينا في يناير مفيش حجة بقى لازم في أسرع وقت يكون فيه رأس حربة".
واستطرد: "لك الله يا جمهور الأهلي في مروان محسن وأزارو، قفشة كان بيلعب بمزاج، أي حد هيلاعب النادي الأهلي هتصيبه لعنة النادي الأهلي فربنا يستر على أي فرقة الفترة اللي جاية، اللي هتعادل مع النادي الأهلي يبقى عمل إنجاز واللي هيكسبه كأنه خد الدوري".
واختتم: "ألف مبروك للأهلي متصدر الدوري ويليه المقاولون وأعتقد أن مباراة المقاولون هي ممكن اللي تحسم لأنه بيلعب علشان يدخل المربع الذهبي، لو الأهلي كسب المقاولون بنسبة 100% يبقى الدوري النادي الأهلي خلصه وحسم بالنسبة له".
جدير بالذكر أن الأهلي حقق فوزًا ثمينًا على مصر المقاصة بهدفين دون رد، سجلهما علي معلول، ومحمد مجدي "أفشة"، في المباراة التي جمعت بين الفريقين أمس الأربعاء، على ستاد السلام، ضمن منافسات الجولة الـ11 من مباريات الدوري المصري الممتاز.
تابعوا آخر أهل مصر على Google News
