نجم الأهلي يهاجم موسيماني :" اللي بيحصل غلط ومش مظبط"

هاجم الإعلامي أحمد شوبير، نائب رئيس مجلس إدارة الاتحاد المصري لكرة القدم السابق، الجنوب إفريقي بيتسو موسيماني، المدير الفني للنادي الأهلي.

وقال شوبير، في تصريحات إذاعية:" مش هغير كلامى ومش هبطل أقول اللى بيحصل فى الأهلى غلط ومش مظبوط، ودى الحاجة الوحيدة اللى مخليانى قلقان رغم أن فرص صعود الأهلى لربع نهائى دوري أبطال أفريقيا 99.9%".

وتابع نائب رئيس اتحاد الكرة السابق:"إزاى الأهلى ياخد راحة 8 أيام، فى لاعيبة كتير مش بتلعب ومعندهاش إجهاد وكان لازم يرجعوا للتمرين بدرى، يعنى إيه الفريق يرجع يوم 27 مارس وعنده مباراة يوم 2 أبريل، بجد إزاى حد يفهمنى ليه الأهلى النادى الوحيد فى مصر اللى مبيلعبش مباريات ودية".

وعن الهجوم عليه قال شوبير:"الناس عملت برامج ترد عليا وانا بردو مصمم ومش هغير كلامى وأعتقد أنا بفهم شوية فى الكورة وكنت بلعب زمان لو نسيتوا يعنى ، وحد بيقولى أصل دى مدرسة جديدة ياكابتن فى التدريب، والله بحكم شغلى بتابع كل الدوريات ومسمعتش عن المدرسة الجديدة فى التدريب دى غير فى الأهلى".

وأتم شوبير تصريحاته قائلا:"فيها ايه يعنى لما يرجعوا بدرى شوية ويتعمل برامج لتجهيز اللاعبين بتوع الدكة ونعمل مباريات ودية نشوفهم كويس ، أعتقد مطلب مشروع".