علق الفنان شريف إدريس أحد الفنانين المشاركين في مسرحية بودي جارد، الذي عرضت منذ يومين على موجة الإنتقادات التي وجهت لهم كون المشاهد لم تكن كوميدية ساخرة وأثارت على جدل كبير عبر السوشيال ميديا.
وكتب شريف عبر حسابه الرسمي بموقع فيس بوك:'مساء الخير، أنا كممثل في عرض مسرحية بودي جارد وليا الشرف الكبير إني اشتغلت مع الزعيم، مش من حقي أرد علي أي انتقادات اتوجهت للمسرحية حضرتك كمتفرج عجبتك المسرحيه أو ماعجبتكش ده حقك الشرعي تماما ونقدك علي رأسي لكن الناس اللي بتتطاول بشكل قليل الأدب لازم اقولهم كلمتين مهمين'.
وتابع :'أولاً مش أنا اللي هتكلم عن عادل إمام وتاريخ عادل إمام ثانيا أنا اشتغلت في المسرحية دي في يناير ٢٠٠٦ لحد ماقفلت في نهاية ٢٠١٠ وكنا بنعرض صيف وشتا وسافرت مع المسرحية أكتر من بلد عربي وكنت بتخض من حجم الحضور لمسرحية مستمرة لمدة ١١ سنه أيوه بتخض ده كان فيه جمهور حفظتهم من كتر مابيحضرو المسرحيه'.
وأضاف:'في السفريات كنت بتخض من استقبال الزعيم في أي بلد بنروحها وحجم الجمهور اللي بيحضر في أي بلد وأقول لحضراتكم علي حاجه مهمة كان فيه ناس بتيجي تتفرج مره واتنين وتلاته علشان بس يشوفو عادل إمام المسرحية دي نجحت بكل مقاييس النجاح في وقت عرضها ومع اختلاف الزمن يمكن ماتعجبش حضرتك'.
واختتم:'بس للأسف اسمحلي أقولك ان حضرتك مش مقياس للنجاح والفشل مع احترامي الشديد بدليل انها أغلي مسرحية اتباعت في تاريخ المسرح ونجاحها أنا كنت بشوفه كل ليله بعيني نجاحها اللي أهم من الفلوس نجاحها الحقيقي في الجمهور اللي حضرها لمدة ١١ سنه متواصلة وحب الناس لعادل إمام وتاريخه اللي مافيش حد قدر يوصل لربعه ولا حد هيوصل من الأخر انتقد براحتك بس بأدب ونقدك علي رأسي'.
تابعوا آخر أهل مصر على Google News
