مفاجأة.. عمرو مصطفى يعلن انتهاء الخلافات مع أسرة أم كلثوم

أعلن الفنان عمرو مصطفى، عن التوجه إلى مكتب المستشار ياسر قنطوش، محامي أسرة أم كلثوم، من أجل تسوية سوء الفهم بينهم.

وكان خلاف دب في الفترة الماضية بين الطرفين، بعدما أعلن عمرو مصطفى تقديم أغنية جديدة بصوت أم كلثوم، عن طريق تقنية الذكاء الاصطناعي، مما أثار جدلا كبيرا، وقدمت السيدة جيهان الدسوقي، حفيدة أم كلثوم، بلاغا للنائب العام، ضد عمرو مصطفى.

ونشر عمرو مصطفى، مقطع فيديو منذ قليل، عبر حسابه الشخصي بفيسبوك، ظهر فيه برفقة المحامي ياسر قنطوش، وقال: 'النهاردة موجودين عند محامي أسرة السيدة أم كلثوم، وحفيدتها الأستاذة جيهان، وموجود المحامي الخاص بيهم، وأنا بقولها من دلوقتي إن إحنا لو استخدمنا اسمها أو صورتها، مش هنلجأ لأي حد غير الأسرة المسؤولة عن الحقوق'.

وتابع عمرو مصطفى: 'لكن إحنا العمل بتاعنا لسة قائم والمشروع قائم، لكن ليس بصورتها أو بصوتها أو أي حاجة تخصها، ولو استخدمنا أي حاجة مندا، هنلجأ إلى أسرة أم كلثوم، مش عايزين مشاكل، أنا في يوم من الأيام هيكون ليا أسرة، وبعد ما أموت هيبقى ليا أحفاد مش عايز يحصل فيهم كدا، فلازم نطرق البيت من بابه.. وأنا جيت النهاردة عشان نخلص القصة دي، لأن ناس كتير عمالة تقول بلاغ ومش بلاغ'.

من جانبه قال ياسر قنطوش محامي أسرة أم كلثوم: 'أنت شرفتنا يا نجم، وبجد بشكرك لأنك دخلت البيت من بابه، وكل الشكر والتقدير ليك، وموضوع البلاغ هيبقى فيه إرجاء بالتنسيق مع الأستاذة جيهان، اللي تم التواصل معها واتفقنا أن عمرو مصطفى باسمه وتاريخه الكبير، هيبدأ يأخد مننا تعاقد وتنازل عما يشتغله بشكله الجديد، باشكره كلمني فورا، قالي إنه راجل يعرف الأصول، ودارس قانون ومحامي قبل ما يكون ملحن ومغني، واتقفنا في كل الأحوال أنه هياخد تنازل من صحاب الحقوق الأصليين لأن دي حاجة جديدة بيعمل لحن جديد بكلام جديد بصوت أم كلثوم، أما موضوع المحتوى فخاص بعقد بينا، وشركة بنحترمها كلنا، والورثة، مدتها 50 سنة، ودا مش مجال نتكلم فيه دلوقتي، والبلاغ هنعملّه إرجاء'.