أسعار السلع تشعل غضب أهالي المناطق الشعبية في الفيوم: أكلة العدس بقت حلم

سادت حالة من الاستياء والغضب، بين أهالي المناطقة الشعبية في محافظة الفيوم، بسبب الارتفاعات المتتالية التي أصابت أسعار معظم السلع الغذائية الأساسية.استياء أهالي الفيوم من الأسعار

الحمد لله على نعمة عدم الإنجاب

والتقت 'أهل مصر'، مع إحدى السيدات بمنطقة كفر القرعة، وتدعى 'سيدة الجمل'، 56 عاما، مطلقة، التي قالت: 'الحمد لله إني مخلفتش، ربنا عالم بيا أنا بقبض معاش والدي الله يرحمه، 1200 جنيه، وأنبوبة الغاز في السوق السوداء بـ150 جنيها، غير الكهرباء والميه، والعلاج بسبب مرضي بخشونة الركبة'.

أهالي الفيوم

ارتفاع أسعار الفول المدمس وقرص الطعمية

وأضافت: 'كانت باشتري فول مدمس بخمسة جنيها أفطر بها، أصبح الآن لا يوجد فول هذا المبلغ، وأصبح قرص الطعمية باتنين جنيه، فعشان أفطر وحدي محتاجة 10جنيهات، في 30 يوما، يبقى 300 جنيه فطار بس الشهر'.

وتابعت: 'دا غير وجبتي الغذاء والعشاء، أجيب منين؟! دا اللحمة مش بشوفها إلا ثواب في العيد الأضحى، وحتى الفراخ البيضاء لا أستطيع شراء هياكلها، حتى العدس أصبح حلما بعيدا'.

مش عارفه اتجوز الأجهزة الكهربائية نار

من جهتها قالت فتاة تدعى 'رانيا الكومي'، 30 سنة، بعد وفاة أمي وأبي عايشة في شقة لوحدي، ومش لاقية شغل، ومعاش أبي لا يسمن ولا يغني من جوع، أصبحت الدنيا سوداء أمامي، مش عارفة آكل ولا أشرب، مفيش غير دفع فواتير المياه، والكهرباء، والغاز، مش عارفة أشتري أي شيء لجهازي، وبسبب كدا مفيش عرسان بتجيلي، هيجوا ليه وأقل تلاجة بـ30 ألف جنيه'.

في الوقت نفسه قالت ربة منزل، تعول ابنتها الوحيدة، وتدعى 'سعاد القللي': 'عملت مشروع لبيع الخضروات والفاكهة، لكي يساعدني على المعيشة وبسبب الغلاء مش قادرة أوفر أي مبلغ لتجهيز بنتي، ونظرا لظروف الجيران، أبيع لهم الخضروات والفاكهة لمدة أسبوع على النوتة، وانتظر باقي الشهر ألم الفلوس واشتري بيها تاني، ومش عارفه أعمل إيه الناس بتصعب عليا، ومقدرش أمنع حاجة عن الناس لأننا غلابة زي بعض'.