طمأن الفنان مجدي كامل جمهوره ومحبيه على الحالة الصحية لنجله عادل مجدي كامل حيث قال أنه أصبح بحالة جيدة في وقتنا الحالي وذلك بعد تعرضه للتعب شديد خلال الفترة الأخيرة دون أن يعرف السبب، مضيفا :'هو أحسن دلوقتي قدر الله ماشاء وفعل.. ياريت الناس كلها تدعي له'.
وقال رواد السوشيال ميديا إن نجل الفنان مجدي كامل أصيب بفيروس كورونا بسبب أعراض ذلك المرض التي ظهرت عليه حيث قال مجدي في تصريحات خاصة لـ 'أهل مصر' أن ما يقال ليس له أي أساس من الصحة وعار تماما وتلك الأعراض الذي ظهرت عليه يتعرض لها أي شخص، موضحا :'كان عنده دور برد.. بس برد شديد شوية'.
وأشار مجدي كامل إلى أن ما حدث معه أسرته من حوادث وتعرض أساس منزله للغرق بالكامل ومرض نجله في الفترة الأخيرة، هو الحسد وأنه هناك أعين تتربص له، مطالبا جمهوره ومحبيه الدعاء لأسرته.
وفي نفس السياق كتب عادل مجدي كامل،: 'أنا بكتب الكلام ده وأنا ايدي بتترعش، وفعلًا تعبان، ومش قادر، ومش عارف أنا عندي إيه، ومش عارف أتكلم مع حد علشان مش عايز أخلي حد يشيل همي'.
وتابع عبر حسابه الرسمي بموقع تبادل الصور والفيديوهات الشهير بـ 'إنستجرام': 'بس هكتب الكلام اللي عايز أكتبه ده علشان أنا مش عارف اللي جاي إيه ولا هيحصل إيه، أنا حياتي بايظة بقالها 4 شهور من يوم 15 يونيو لحد النهاردة 15 أكتوبر، الأربع شهور دول أوحش أربع شهور عدوا عليا في حياتي من يوم ما جيت الدنيا، علشان حصلي فيهم حاجات وجعتني وتعبتني وأثرّت على نفسيتي'.
واستطرد 'أولهم كان أول حب في حياتي عاش لمدة سنة ونصف، وكان نهايته يوم 15 يونيو، بعدها كان وفاة حفناوي صاحبي وأخويا، يمكن مكناش قريبين من بعض بس مجرد مبنتكلم مع بعض أو بنشوف بعض بيبقي أكننا نعرف بعض من الحضانة، وكان فيه ذكريات حلوة أووي لينا مع بعض، بعدها أمي كانت هتموت في حادثة عربية، والحمد الله ربنا سترها وعدت على خير، بعدها البيت بتاعنا لما غرق كله ولحد دلوقتي منعرفش غرق إزاي ولا إيه اللي حصل، بس الحمد الله على كل شييء ولحد دلوقتي البيت لسه بايظ'.
وأكمل حديثه: 'وآخرهم بقى وده لسه من 3 أيام، إني تعبت جدًا فجأة وتعبت تعب مش عادي، ومش عارف أنا عندي إيه، ولا الدكاترة عارفين عندي إيه، خدت جميع الأدوية وحقن وبنام كويس وباكل كويس وبعمل كل حاجة وبرضه مفيش أي تحسن'.
وأضاف قائلًا: 'بكتب الكلام ده دلوقتي، ومش حابب كده خالص، ولا كنت عايز أعمل كده بس عملت كده، وكتبت كده، وهنزله علشان أنا بجد خايف من اللي جاي، ومش عارف إيه اللي ممكن يحصل، فعلشان لو حصل حاجة أكون كتبت كل اللي جوايا وأكون ارتحت إني عملت كده'.
وأردف: 'وعلشان برضه تكونوا عارفين إن الضحك والهزار والخروج والاستوريز مش دي الحياة الحقيقية، الحياة الحقيقية هى اللي أنا حكيتها دلوقتي، محدش يعرف إنت حياتك عاملة إزاي ولا إيه اللي بيحصل فيها، ولا جواك ايه، كله شايفك في صور وفيديوهات مش حقيقية'.
واختتم كلامه قائلًا 'المهم ربنا يستر في اللي جاي، ويعدي علي خير إن شاء الله علشان المرة دي، أنا بجد حاسس بالموت، فلو عدت علي خير حياة الواحد هتتغير تماماً في كل حاجة حتة في الصور و الفيديوهات، آسف إني طولت عليكوا، يارب إنت الشافي المعافي'.
تابعوا آخر أهل مصر على Google News
