منى زكي: مش هتكلم على "نمبر وان" لأنه حاجة متخصنيش

أبدت الفنانة منى زكي، سعادتها البالغة بتكريمها في مهرجان القاهرة للدراما، كأفضل ممثلة عن دورها في مسلسل "تحت الوصاية" الذي عرض رمضان الماضي.

وقالت "زكي" خلال مداخلة هاتفية مع برنامج "حضرة المواطن"، المذاع عبر قناة "الحدث اليوم": "كرم كبير والحقيقة مش أنا بس ده ناس كتير يستحقوا، الفضل الأول في الفكرة للكتاب الكبار خالد وشيرين دياب، هما الأساس في الورق وكمان الشكل النهائي والصورة بتاعت كل زمايلي نتاج فنان كبير عظيم المخرج محمد شاكر خضير".

وأضافت: "احنا شغلتنا عبارة عن عمل جماعي فيه عناصر كتير جدًا مشتركة فيه، وإذا كل العناصر معملتش شغلها بحب وضمير أكيد مش هتكون النتيجة كدة، والحقيقة إن اللي ورا الكاميرا مجموعة فنانين وفنيين موهوبين، صناعتنا صناعة مهمة؛ مش لأنه ممكن نوصل منها قضايا كبيرة، ولكن مجرد رسم ابتسامة ومشاركة إحساس حد فاكر إنه لوحده كل ده بالنسبة لي طوق النجاة في الحياة".

وتابعت: "مش هتكلم على لقب نمبر وان لأنه حاجة متخصنيش، العمل الفني هو عمل جماعي سواء مسرحي أو تليفزيوني أو إعلامي".