إذا كان مونديال قطر 2022 يخطف أنظار المشاهدين داخل استادات كرة القدم، فهناك حكايات خارج الملاعب يجب أن تروى، ومن ضمن هذه الحكايات قصة شاب جميل من كينيا اسمه أبو بكر عباس عمره ٢٣ سنة عاما .
بدأت حكايته مع المونديال كما يرويها رواد السوشيال ميديا كالآتي : أبو بكر خد بعضه وقدم علي الوظائف اللي مفتوحة في قطر خلال كأس العالم لخدمة المونديال..
أبو بكر اشتغل شغلانة مملة جدًا لو بس فكرت تحط نفسك مكانه استحالة ترضي بيها .
الشغلانة عبارة عن إنه قاعد علي كرسي جنب الإستاد وماسك ميكروفون زي بتاع الروبابيكيا ده ولابس كف كبيييير وكل شغلنته إنه يقول الجملة دى بس فقط لا غير 'Metro this way”علشان يوجه الجمهور والأجانب لاتجاه المترو !!
ويتسائل مستخدمي مواقع التواصل الاجتماعي في منشورهم : إنت متخيل قاعد ٨ أو ٩ ساعات ومش بيقول غير الجملة دى بس.أبو بكر قرر يسلي نفسه فبقي يقولها بطرق مختلفة ومتكررة ويغنيها للناس وبرضه مش بيقول غير الجملة هي هي بس بطريقة لذيذة.
أيقونة المترو والمونديال
ويتابع المنشور: 'يشاء القدر إن الجماهير والناس والمواطنين يتفاعلوا معاه ويتحول أبو بكر من مجرد شخص قاعد علي كرسي كمرشد للزوار للمترو إنه يبقي 'أيقونة' المترو والمونديال لكل الناس..
الجماهير بقت تروح هناك تقول معاه وتغني معاه ويتصوروا معاه ويصوروه.. كل الصحف العالمية والمحلية فضلت تتكلم عن العظمة دي.. لدرجة إن 'الشيف براك' يروح عنده ويقف قدامه ويقلب حلة المحشي الشهيرة بتاعته علي أنغام 'Metro this way' ويتصور معاه كمان وينزله علي صفحته الرسمية'.
تكريم قطر لأبو بكر الكيني
واستطرد المنشور : 'دولة قطر بقي قالت لا إحنا مش هنفضل ساكتين علي الجمال والعظمة اللي بيعملها أبو بكر ده.. فجابوا أبو بكر وكرموه وادوله كمية هدايا لا تعد ولا تحصي من كل البراندات.. ومش بس كدة دول مدوا الفيزا بتاعته سنتين .. ومش بس كدة لا دول خلوه 'سفير مترو قطر'.. وراحوا مسجلين صوته وطريقته وحطوها علي كل ميكروفونات مرشدين السياح للمترو وبقي صوته هو الصوت الرسمي لإرشاد مترو قطر خلال المونديال فبقيت تسمع صوته وطريقته في كل حتة في قطر'.
اللجنة المنظمة لكأس العالم
وأضاف : 'راحة اللجنة المنظمة لكأس العالم قالت هيا الناس دي كلها تقدر الراجل ده وإحنا اللي الراجل جاي من بلده علشانا منعملش واجب معاه.. راحوا بعتين للراجل دعوة VIP لحضور مباراة إنجلترا وأمريكا.. وهووووب بين الشوطين نزلوه الملعب وادوله المايك وأبو بكر يقول 'Metro” وكل الجماهير اللي في الاستاد ترد عليه “This way” .
واختتم: 'أبو بكر عمل بروفايل علي كل السوشيال ميديا والفيديوهات بتاعته تخطت المليون مشاهدة وكأن ربنا بيقوله مش أنت تعبت وسعيت فخد من حيث لا تدري.
الخلاصة هنا إنك طالما قررت تسعي وتقبل شغلانة حاول تعملها بحب وبطريقتك وطول ما انت بتشتغل كويس فشغلك هيبان وهيسمع غصب عن عين أي حد..
مبروك علي أبو بكر كل الخير والرزق اللي ربنا رزقه به وشكرا ليه إنه علمنا درس كبير'.
تابعوا آخر أهل مصر على Google News
